沙螺洞周潤發

孔子五十而知天命， 50後的周潤發，演過賭神，扮過龜仙人，還演活了孔子。從影逾 30載的發哥，順天而行，漸漸退下來。陶淵明誤入桃花源，最後歸園田居，可是發哥還未想到退休，但他在大自然和黑白相片中找到現世天堂。由被拍者變成拍攝者，角色轉換，心態隨之而變。水銀燈下五光十色，再璀璨也會膩，黑白世界之美不在於極端黑與白，而是追求中間灰之美。

大隱隱於市，石屎森林也有塵世天堂。天堂藏身荒村，荒村名叫沙螺洞。一年才拍一部電影的發哥，這天帶齊架生拍照去。車子駛上羊腸小徑，一路顛簸。抵達目的地，野狗零落，如入無人之境。再走約半小時，終於來到目的地──鶴藪水塘。
沿路找獵物，行行重行行，又踎又跪攀山涉水尋角度。

攝影悟黑白灰人生

發哥對黑白相情有獨鍾，愛其黑與白之間的灰，從中領悟人生大道：「每件事對與錯，其實中間有好多灰階。」　攝影：周潤發

10年前發哥迷上攝影，玩菲林機，只拍黑白照。一大清早就出發獵影，等上大半天，一張起兩張止。這天在水塘忙了個多小時，拍了四張。算多了。
激流冲石。發哥眉頭緊皺，拿着測光錶測光，度位，換鏡。放眼盡是枯枝殘葉，說不盡的荒凉，在黑白世界卻是另一片光景。
「黑白相唔係我哋肉眼睇嘅有色彩嘅嘢，係要入咗另一個空間去睇。我鍾意黑白相因為佢唔係極黑極白，而係追求個中灰，最美嘅就係嗰個中間灰，個灰階係好長好長。每件事對與錯，其實中間有好多灰階。」
黑與白中間有灰，起點與終點之間有過程。極端的美在於一瞬即逝，惟獨冲積過程漫長。發哥說：「水銀燈下五光十色嘅生活，我已經過咗好耐好耐。人一定要有個平衡嘅，我覺得攝影同鍾意大自然係我嘅根。」

一生精采順應天命

發哥是 50後，今年 55歲。去年他用匆匆數月走過孔子的一生，孔夫子曰五十而知天命，發哥亦然：「再遲啲就耳順（ 60歲）喇，要聽人講，家咪聽天由命囉，抱住平常心。每個人都有佢嘅功用，好似周潤發生咗出嚟，由電視做到電影， 30幾年嚟淨係做呢樣嘢，咁我覺得呢樣嘢好適合我，令我可以安居樂業，我亦樂此不疲，同黑白相個要求一樣，不斷都要磨練學習。」
本是南丫島原居民的發哥， 17歲輟學，由 bellboy做到國際巨星，看似刻意經營，發哥卻是漫不經心：「嗰陣我同金公主冇約，就去咗美國，唞咗兩年學英文搵機會，好好彩俾我拍到第一部戲，其實嗰個係我人生最大嘅轉變。由頭到尾我嘅性格冇變到，我冇好大嘅理想，冇野心，冇刻意去做啲乜嘢，係環境、條命、好多貴人帶住我走。我都冇腦嘅，有乜嘢諗啫？哈哈！你最好要我拍戲，拍完戲我就瞓覺。」
80後有條件講理想， 50後，講生計。發哥說：「嗰時精神生活都係工作囉，嗰陣就係去搵錢，最緊要老闆賺到錢，老闆賺錢呀，咁先有戲拍。」

欣慰 80後關心香港

80後手挽手在立法會門外示威，齊齊反高鐵保衞菜園村，令發哥深受感動。　資料圖片

眼看一班 80後年輕人為反高鐵拋頭顱灑熱血，發哥感謂：「每個年代都有啲有理想同對社會有訴求嘅青年，我哋嘅年代都有天星碼頭（ 66年反對天星加價）、保釣。
「我哋又唔識，一出世就因為窮要不斷做嘢賺錢，家香港環境好咗，咁佢哋嘅理想可能同我哋唔同，但多啲年輕人關注社會係好事，起碼佢哋對一個地方有關心、有愛心。
「我見過一個 10幾歲嘅，佢學都唔返、或者放咗學就揸架相機拍呢啲咁嘅嘢，有次走咗去內地聲援，俾人拉咗入房，佢好驚返唔到嚟……幾欣慰 o架，你唔好以為呢班人唔識嘢，其實佢哋對社會嘅關懷比大人仲犀利。」

沙螺洞私訪記

3:19pm　《抵達古村》
進入沙螺洞村，發哥指着村民遺下的告示念念有詞：「有意思，得閒嚟欣賞吓，幾百年。」

3:20pm　《五星公廁》
發哥對這五星級「公次」很感興趣，還寫明不准大便。裏面只有一個桶載小便，用作施肥。

3:21pm　《發現農田》
沙螺洞村雖已荒廢，但不少有心人來此開墾荒地耕作，發哥自言也希望將來能夠歸園田居。

3:26pm　《冰冷爐灶》
村長這天沒開檔賣山水豆腐花，發哥摸摸冷冰冰爐灶說：「唔熱喇，佢哋都走咗好耐，凉，凉。」低迴不已。

3:27pm　《鄉情不再》
相中人就是沙螺洞村的村長伉儷。村裏的村民大多已經搬出大埔或移民，昔日的鄉情已逝。

3:33pm　《寂靜祠堂》
村中祠堂，從前每有節慶，村民聚集放鞭炮響鑼鼓，興高采烈舞麒麟，現只存留記憶中。

3:37pm　《遇行山者》
遇行山之友，愛獨自獵影的發哥自言「怕人多過怕鬼」，他笑指行山友說：「人係你鬼又係你。」

3:45pm　《隨處獵影》
往鶴藪水塘途上，發哥看上一片浮葉，即用手指整成一個圈，仔細打量浮葉，度位拍照。

沙螺洞村始建於清康熙年間，具有客家建築特色的張屋和李屋建築群今已滿目瘡痍。這裏被譽為蜻蜓天堂，上世紀 80年代賣給發展商興建高爾夫球場，後因保育問題擱置，現淪為孤城荒野。村民搬走以後，村長偶爾回來開檔賣山水豆腐花。惜此情將不再，皆因官商合營在此建靈灰閣，預算收入逾 60億。
發哥當年拍《網中人》曾在沙螺洞取景，他說：「呢度就係得水聲，雀聲，開心到不得了，住一世都願。」

質疑高鐵效益

這天村長不在。發哥指指眼前一大片荒地說：「以前全部都係種禾呀、種菜 o架。」走到張屋村 11號，門庭蕭條，門前一副褪色門聯更形諷刺，發哥輕誦：「門庭興旺福高照，華堂福澤壽綿長，唉。」又說：「因為第日嗰個經濟效益，全部都咁功利。有硬件都要有軟件，你都要畀人睇吓幾百年歷史嘅嘢。官字兩個口，一般蟻民點樣出到聲。」
07年 4月 28日，發哥到皇后碼頭，跟露宿抗爭者打氣說：「如果真係得嘅（原址保留）時候，你哋就係英雄！」皇后與英雄，俱往矣，發哥攤攤手說：「有鬼用咩？最後又係拆。」話題回到高鐵。發哥說：「咁高嘅成本，將來收唔收得番？發展商一路吞噬土地，政府又冇長遠政策，農地變咗泊車、貨櫃場。元朗有人種米，政府又唔係好贊成……土地對香港人好緊要，如果你話菜園村，撥啲地畀佢哋補償，政府又冇……唔係錢唔錢嘅問題，而係歸屬感。」
抗爭連連，有人就說香港已經不和諧了，發哥就說：「有屋住，有飽飯食，有錢使，大家咪和諧囉，但你做到個社會啲人喺貧窮線以下，叫人點生活呢？」