呢期無論喺電視、報紙定港鐵車站，都見到 SmarTone-Vodafone賣行晒廣告， sell佢哋新出嘅住宅寬頻，話只需一個好似機頂盒嘅接駁器，就可以用 WiFi同 LAN線上網，而且仲包埋家用電話，「全屋人一啪即上」，月費只係$148！聽落咁平，好多 friend同讀者都話有興趣，但又唔清楚點玩，個個走嚟問我。而我又懶得逐個答，不如喺度講晒成件事點運作，同分析畀大家睇究竟抵唔抵用啦！
火併 4大電訊商月費
講多無謂，大家揀寬頻同家用電話 plan時，首要條件一定係價錢，所以第一步就等我列晒 4大電訊商嘅收費，去同 SmarTone-Vodafone（下稱 SMV）比一比，邊間最平就一清二楚喇！
SMV抵在全包
計晒寬頻同家用電話嘅收費， SMV嘅月費真係最平。稍為接近佢嘅有線寬頻，上載速度只得 1.5MB， send嘢畀人反而冇咁快，而且仲要自己買 router，平極都要$180啦！至於香港寬頻嘅$168月費都算合理，有 25MB上下載速度，可惜電話嘅增值服務一項都唔包，連基本嘅來電顯示都冇，要畀$20至$30逐樣買番，計落都幾貴。至於和記寬頻同電訊盈科嘅月費都過$200，簡直係富貴人家之選啦！
SMV接駁器解構
見到咁平想用，都要知道埋個接駁器究竟係乜，同點樣令你又上到網兼打埋電話？簡單嚟講，佢其實係一個具備 3.5G接收功能嘅無線 router，買機時機入面已插住一張 3.5G SIM咭，靠佢嚟接收 internet同話音訊號，然後經 LAN線或 WiFi去分享寬頻，以及連線駁通家居電話。
＊出機時要付$1,200接駁器按金， 24個月合約期後會全數退還，但如果以信用咭自動轉賬繳交月費，就可以全數免繳付按金。
查詢： SmarTone-Vodafone（ 2880 2688）
＊出機時要付$1,200接駁器按金， 24個月合約期後會全數退還，但如果以信用咭自動轉賬繳交月費，就可以全數免繳付按金。
查詢： SmarTone-Vodafone（ 2880 2688）
IN︰ SIM咭接收訊號
機入面插住張 3.5G SIM咭，好似手機咁經流動網絡接收 internet同話音訊號。
OUT︰連線駁家用電話
機背有個電話線插孔，用佢接駁屋企電話。上台時 SMV會開個 3字頭嘅固網號碼畀你，而你亦可以帶用開嘅號碼去 join呢個 plan，咁就唔使轉屋企電話號碼。
OUT︰ LAN線分享寬頻
機背有 4個 LAN插頭，能經 LAN線 share 3.5G寬頻畀 4部電腦或 notebook用，好似普通 router咁。
OUT︰ WiFi無線 share
呢個接駁器亦支援 WiFi，可將寬頻無線分享畀 PSP、 NDS、 netbook等 gadgets，咁就唔只得 4部機上到網，亦唔使拉線，幾方便！
啟用設定 4部曲
呢個接駁器駁線簡單之餘，原來啟用寬頻同電話嘅程序亦一樣唔難， 4個 step搞掂晒！
step 1︰去 SMV門市上台後，就可以直接帶個接駁器走，返屋企自己接駁同啟用，唔使等師父上門拉線咁麻煩。
step 2︰用 LAN線將接駁器連接上電腦後，就會自動彈出一個啟動畫面，只要一按確認選項，啟用過程就完成晒，以後唔再駁 LAN線都得。
step 3︰跟住好似普通 router咁，喺 IE網址列輸入 192.168.1.1，就會見到設定版面，再喺 Advanced Settings中嘅 WPA Pre-Shared Key打入密碼。
step 4︰最後啟用電話功能，第一次無論你打乜號碼，都會被轉駁去 SMV嘅服務熱線，跟住服務人員指示核對資料，啟用程序就完成。
住宅寬頻 Q&A
既然 SMV呢個接駁器係行 3.5G SIM咭，月費又比所有流動寬頻加手機通話費平，總有人會得一想二，想將呢項家居服務帶出街用。但電機兒話畀大家聽，呢個諗法其實係唔 work嘅！因為呢個 plan只會有一個發射站傳遞訊號去你屋企，一離開呢個站就乜都收唔到，所以根本唔可以當流動寬頻用。至於仲有乜用法係得，點用先算違規，等我數晒畀大家睇！
搬屋冇問題
用用吓要搬屋嘅話，只要喺前一日打去 SMV服務熱線度改地址，不另收費，第二朝 9點就可以喺新屋繼續用。
商用貴少少
商業用戶想用嘅話，就要 join商用 plan，月費$238，其他條款不變。但你唔好妄想用公司地址扮屋企地址去登記，因為 SMV有個 list，知道晒邊啲係商廈同工業大廈，地址喺呢啲大廈嘅客戶，都唔可以 join家用 plan。爭$90啫，咪扮嘢啦！
出街隨時罰
由於啲訊號係來自你屋企附近嘅發射站，所以拎部接駁器過隔籬單位，或者拎去樓上樓下用，其實都有可能用到。但如果拎得太遠， SMV check到你轉咗去第二個發射站收訊號嘅話，就會罰你停用 2小時，之後要返到屋企先至用得番。
手機用唔到
個 plan咁筍，梗有人想掹接駁器張 3.5G SIM咭出嚟，插落手機出街用啦，但其實都係唔得嘅！事關不論你企喺屋企定走出街，一放張 SIM咭入手機，一樣打唔到電話同上唔到網嘅，咪咁貪心啦！
掹咭小心壞
其實 SMV唔建議大家打開接駁器條 SIM咭槽，所以用張「 VOID」 label封住，撕開咗未必會喪失接駁器嘅保養，但發現係因為掹 SIM咭而整壞部機， SMV可能會收取零件費。電機兒都試過插其他台 SIM咭入去都用唔到，真係唔好咁多手。
溫馨提示
1.假如你擔心屋企 SMV訊號唔夠，不妨先去報攤買張$68嘅 SMV儲值咭。用手機喺屋企試一試網絡，覺得接收 ok先 join佢個住宅寬頻，咁就唔會簽晒約，至知訊號唔夠！
2.一般固網嘅寬頻同電話，係分開兩個網絡傳送，但 SMV個網絡係同時包含晒兩樣嘢，如遇上網絡問題，有可能寬頻同電話都會停晒。
3. SMV同其他固網寬頻一樣，有太多 gadgets同時經 WiFi share寬頻，上網速度就會被拖慢，所以唔建議同時用多過 8件 gadgets去分享寬頻。
2.一般固網嘅寬頻同電話，係分開兩個網絡傳送，但 SMV個網絡係同時包含晒兩樣嘢，如遇上網絡問題，有可能寬頻同電話都會停晒。
3. SMV同其他固網寬頻一樣，有太多 gadgets同時經 WiFi share寬頻，上網速度就會被拖慢，所以唔建議同時用多過 8件 gadgets去分享寬頻。
用後感︰上網實夠用
先旨聲明，電機兒反對老翻，但好多玩開 BT嘅賤格朋友，都問呢個 plan畀唔畀 BT，結果 SMV好大量咁話「冇問題」！真係益晒班賤友。
7.2MB下載速度，雖然唔係 3.5G中最快，但平日上網都算足夠。試玩時發現下載 file時，平均速度都有每秒 500KB左右，即係唔使 3分半鐘就下載完 100MB。睇 YouTube時， load片亦唔使等好耐。打電話方面，我坐定定喺屋企煲粥，真係聽唔出同普通固網電話有乜分別。
