forever hea: cwb 無招牌海鮮

去邊度食海鮮？西貢嫌悶、鯉魚門咁逼、流浮山又遠……抗拒做遊客生意的所謂海鮮酒家，要材料夠新鮮，仲要考慮地點、預算、種類等等多方面因素，點敢求其敷衍了事。
好在，近日唔少海鮮餐廳開業，中式西式有平有貴，掛住胡椒炒蟹的可以幫襯新加坡名牌，銀根鬆動梗係出海歎私房宴，或者平平哋一樣食到酒店級菜式。只要肯花心思發掘，總有新意。

無招牌海鮮在新加坡無人不曉， 1981年由熟食中心檔口起家，現在於老家已有六間分店，印尼雅加達另有兩間，唔少香港人去親新加坡旅行都專程去捧場，第三代老闆 Sam決定在港開鋪。新店籌備足足花了三年，因為 Sam希望地點既要就腳，更要貫徹所有分店有海景的特色，選址特別困難。裝潢亦很花心思，間間分店主題不同，香港店走年輕路線，一室白及青綠，配上透明膠椅，醒目有型。
菜式只有總店餐牌的一半，約十款海鮮及十多款小菜，選擇唔算多，當然少不了招牌蟹，貨源同新加坡店一樣，主要用斯里蘭卡野生泥蟹，全線每日賣出共千三隻，重量以噸計！隻隻斤兩十足，巨型 size足三斤重，入口啖啖肉，肉質結實得來不乾身，可以吃到一梳梳蟹肉，定價亦和總店差不多。想食豪啲，另有水晶蟹或阿拉斯加蟹。
煮法分白胡椒、辣椒、薑葱、甘香及清蒸五款，以招牌白胡椒炒最受歡迎，調味以十多款胡椒及香料製成，由新加坡中央工場運來，秘方是 Sam外婆創業時一直沿用至今，連大廚都不知道其配方！直接運來的調味、一樣的貨源、兩位來自舊店的大廚，加上老闆日日在鋪頭試味，兼預備留港最少三個月，菜式味道自然同總店沒分別。新店晚晚爆場，試過未到八點已經無蟹賣，訂枱時記得留埋蟹呀。