豉汁蒸魚雲，$55
大魚頭斬件後加豆豉、紅椒蒸熟，鮮滑惹味。
蒜茸蒸中蝦，時價
鮮蝦加大量蒜茸去蒸，火候恰到好處。雖然惹味，只是吃罷難免有口氣。
薑葱白蟹，時價
活蟹即叫即劏，加薑葱去炒，鑊氣足，肉鮮美。
十月五日，港聞版。討論最低工資。
灣仔鵝頸橋寶靈頓道大排檔祥正海鮮飯店老闆娘劉玉娟（娟姐）見報。
她揚言：「賣家當出糧都不裁員」，無懼最低工資立法，還說：「如果人哋值，係應該要俾。」
她不是胡扯，祥正十二個全職和三個兼職員工，大部分月薪逾萬。
員工向來亦只有自然流失，從沒裁員。
即使沙士最艱難的時候，她也寧願把手上資產換現金，維持飯店的營運，不讓員工失業。
亂世經營，為何老闆如此有良心？
只因為在這裏，每人都有一個故事。
看着別人，想起自己，甘苦相扶，是他也是你和我。
一人一故事
入秋後，正是大牌檔做生意的黃金檔期。
離時代廣場不過數步之遙的祥正海鮮飯店，簡直就是在港島的市區中心點，佔盡地利。難得客人不嫌熱不怕冷不厭髒，坐在車來車往的路旁，一杯冰凍啤酒，兩碟熱辣小炒，飲飽食醉，為一天劃上完滿句號。
所以即使在平日，祥正七時許已告爆滿。四位？唔該，請等一等。
人客多，樓面阿姐跑來跑去的招呼、落單、傳菜；廚房阿哥密密手的煎炒煮炸，人人忙得一頭煙。
縱然如此，大家還是笑容滿臉。
客人一轉頭、一揚手，阿姐已匆匆趕上來看看有甚麼幫得上忙；在大家埋首吃喝之際，廚子稍為有喘息的機會，又會走出廚房跟熟客吹吹水。
當人客連廚子都熟悉時，可見熟客是真正的熟客，到祥正來就像回家吃飯，格外有親切感。
這份親切感，是店家三十五年的沉澱，由老闆、員工和食客合力建構而來。這裏，人人都有自己的故事，有喜有悲，結合起來，交織出豈止是一間店的面貌？當中還有包容、忍耐與尊重。
;)
以前沒行車，一條馬路可以四行桌椅。
;)
熊熊爐火出鑊氣，是大排檔的精髓所在。
;)
室內掛滿娟姐與名人食客的合照。
;)
一入夜，很快就滿座，遲一點來都要等位。
;)
花生每日鮮炸，甘香鹹脆，是等餸到時的救星。
;)
店前擺放的海鮮全部貼上價錢，明碼實價。
;)
除了小炒，也有滷水食物。
;)
以前連菜都要老闆娘自己去買，現在已有相熟菜檔送靚菜來。
梅姐︰清潔
;)
我有四個仔女八個孫，仔女個個有自己屋企，邊顧得我咁多，你話我係咪要自己顧自己？費事加重佢哋負擔啦。伸大手板問佢哋攞我不如自己賺生活費！
況且我十幾歲已開始做嘢，做慣咗，做嘢個人有尊嚴啲、自由啲。日日開工開開心心，放工就同同事、事頭婆去消夜、打麻雀，做吓做吓又一日。呢度好在冇階級觀念，大大細細都玩得埋，我叫太子爺做「呢條友」都冇問題。
雖然我已經六十五歲，但冇諗過唔做嘢 o架，而家我通常一個禮拜返四五日工，放假就同啲孫去玩吓；再老啲就最多做少幾日，只要事頭婆俾我做，我會做到做唔到為止。我咩都可以幫吓手 o架，只係埋鑊同揸筆唔得。冇嘅，做人嘅嘢，有工開，身體健康就好好啦。
美好的年代
;)
午後，娟姐和夥計開定枱，等晚市來臨。
當然，故事的開初並不是這樣的。
她小學未畢業，一早出社會工作，十八歲便跟了這個男人。
「跟佢，係因為佢對我好好，連對我屋企人都好好。」所以明知他早有沒註冊的妻子，亦跟定他，還不介意與阿姐（大房）一起生活、一起工作。「我自問對阿姐好好，我有二百蚊，會俾一百蚊佢。」
1974年，娟姐和丈夫在現址隔壁租了一個鋪位，門口放架十呎長的手推車和兩個爐頭就賣炒粉麵飯小菜等。男的煮，女的賣，做足早、午、晚市。
「 1978年後要攞牌，我哋先整廚房，前鋪後居。」接待客人的桌椅就全放在路上。
「以前寶靈頓道冇車行 o架，放到四行枱！」
密食當三番，第一桶金就這樣掘到。
「八十年代我哋已經好好景，當時個心淨係識做嘢，賺埋啲錢都冇使，個個銀包都有幾萬蚊現金。最叻就係送晒啲細路去留學。」
沒多久，男人已不大為鋪頭出力，就靠女人一早一午去買貨，樓面、拖地、洗廁所乜都做。
「唉，好多辛酸講唔出。 1993年後生意開始少，仲發覺老公沙沙滾。」有一段時期，男人愈搬愈北，她就一直跟上去。每個月一半時間在香港睇住生意，一半時間追上大陸。
「我唔忿氣吖嘛，我已經係阿二，雖然大細都冇註冊，一樣冇身份，但日做夜做咁辛苦，喂我生完仔十七朝就已經落鋪頭幫手，所以咪睇唔開囉。」
痛苦無人知
;)
舊時海鮮要娟姐每日親自到筲箕灣買，現在已有相熟海鮮檔送貨。
可惜，男人得一想二還不止，仍要三要四要五。她跟住上落半年後，終於放棄，決心回港做自己的事業。
「睇唔開又點？唔通唔做呀，班夥計跟我咁耐，好多未結婚做到結晒婚生埋仔。呢度唔做，好大鑊。」
所以自 1997年起，每逢鋪頭入不敷支，娟姐就拿私己錢出來補貼，開頭是現金，後來是資產。
「冇嘅，有時係命運問題，如果沙士時狠心唔做，我都仲有好多股票、首飾同金條，其實已經足夠退休。」但她不捨得放手。「人哋冇客都揼百幾萬去裝修間鋪，我手上有咁好嘅夥計、咁多熟客，唔做好嘥。」所以貼吓一點，貼吓一點，不知不覺就貼下全副身家。
「我唔覺得自己好偉大，間鋪咁成功，我都開心 o架，而且人人有飯開。」
說到包起 Sally兒女飲食的事，她一點也沒放在心上。
她常覺得，真心對人，人家一定感受得到，自然亦會對自己好。像 Sally「瞓身」為她工作。像阿姐視她如家人，跟她一起在祥正拼搏，十年前才退休。像阿姐的小兒子耀正，年前亦回來幫她手，每天站在魚檔努力地劏魚。
人人走多步
;)
廚房只有兩個爐頭、一個蒸爐和一個炸鑊，就要應付店裏店外約四十張桌子的人客。
人人掏個心出來，每人多走一步，為祥正增添了不少正能量，這些正能量，都反映在食物質素上。
採訪當晚，人流極旺，一鋪一街都坐滿了人，只見樓面阿姐招呼勤快，熟客來，很快便叫得出客人姓氏，得人客笑騎騎。
「這是吳家樂的父母、這是方力申的爸媽……」她們指着牆上的合照說。嘩！連誰是誰父母都記得？「要 o架，你記得啲客，佢哋就會有親切感。做飲食，最緊要不過係食物同客情，要用把口去『馬』實啲客。」
樓面投入，廚房部也士氣高昂，管蒸爐的勤叔、掌炒鑊的阿志、安哥、喜佬，執碼的邦仔，個個各司其職。豉椒炒蜆、椒鹽瀨尿蝦、蝦膏蒸豬肉……一接到柯打，落鑊的，蓬蓬蓬就落鑊。蒸餸的，快快手手就去蒸，幾分鐘就能出菜。
有時遇上樓面阿姐入錯單，老粗的廚子罵一兩句粗話，又回頭重做，一切以事為先。
難得的是個個幫得手，位位做得耐，隨時可以轉換工作崗位，像清潔的梅姐，都可以去劏魚，全部自動波。
人在做天在看
員工又忠心耿耿努力工作，或多或少都是投挑報李，足見娟姐在員工心中的地位。連已另謀發展的員工，都不時回來跟她閒聊。採訪期間，就見有從前在祥正做廚子、現已轉行開五金店的金哥，來幫娟姐做日常維修。
共坐一條船，這是人人都知道的。大夥兒努力，捱過了沙士，生意慢慢回復起色，雖然金融海嘯後客人不再豪食，生意額是少了，最近又出現了另一個難題──不停被控阻街。
「一直以嚟都係咁擺啲枱出去 o架啦，咁耐都冇事，係呢三四年食環署成日嚟抄牌，又要罰款又要扣分，扣滿分就停牌，咁同判我坐監有乜分別？」她愈說愈氣。「打劫都係坐監啫，我仲要罰錢，仲要交稅，咁做賊好過啦。呢句你寫得大隻啲㖭呀！」
對於祥正阻街，法律之外是否要考慮人情，這點我沒有甚麼意見。
但客人對於政府的行動，卻肯定不同意。像前年祥正被扣分扣得要吊銷牌照，娟姐找客人簽名、寫信求情，大家群情洶湧、同仇敵愾支持，結果法官才發回牌照，改罰停牌一個月。
「人在做天在看，你做好事，個天一定會俾返啲嘢你。」這是她說、她信的。
;)
旅協的旅遊冊子和日本的旅遊書都有推介祥正。
;)
