最近外國黑客整咗個極似 Hotmail首頁嘅釣魚網站，呃到 20,000幾人 login，仲將啲 ID同 password公開任人睇！雖然受害者主要係英國人，但其實香港都有唔少釣魚網站，電機兒上《蘋果日報》網頁數過，原來單係今年就有 7單，呢種危機唔係外國先有 o架！
俾黑客偷 email password都事小，再透過 email搵埋你信用咭號碼等機密資料先事大；仲有好多釣魚網站都係扮銀行網頁，唔小心 login錯，真係成副身家凍過水！今期就等我提醒大家，點樣先冇咁易中釣魚網站招啦！
必 check！ 反釣魚網站
;)
有時 msn或 email會收到朋友 send嚟嘅得意網站 link，好似 mini game、相簿之類，部分都會要你輸入個人資料，其實呢啲都可能係釣魚網站，唔好咁易相信。好彩，外國其實有個幾出名嘅反釣魚網站 Phishtank，由大班網友集體舉報釣魚網站，上去 check一 check個網頁有冇問題先睇，安心好多！
網址： http://www.phishtank.com
數盡釣魚招數
其實釣魚網站本身冇乜花樣，只係整得同真網站一模一樣，再將 login ID同 password欄連結到黑客個 database。問題係佢哋點都取代唔到真網址，一定要用個近似嘅網址去扮，點樣引人 click入假網址，就有好多陰招喇，其中可分為下列兩類型。
魚目混珠型
;)
就連你上 Google同 Yahoo search網址，亦唔係 100%安全。因為如果個釣魚網站扮嘅真網唔係太出名，呢兩個搜尋器未必知道係假，要到有人投訴佢哋先識刪除連結，中間嘅空檔有可能令人中招。
易上釣度： 80%
Google有時真係會走漏眼，收錄埋釣魚網站，到懷疑有問題時，先會喺 link下面加句「這個網站可能會損害您的電腦」，見到咪 click呀！
;)
好多 forum都俾人落廣告， post條 link喺版面上，釣魚網站好易混入其中，尤其係啲 BT forum同鹹網，啲廣告 link真係小心為上！就算係 facebook，亦有可能睇漏眼，同 Google一樣俾釣魚網站落到廣告。
易上釣度： 70%
放電影 BT種子嘅 forum本身都咁邪道，有釣魚網站上去賣廣告都唔奇，入之前最好 check清楚！
;)
最常見嘅釣魚方法，黑客扮銀行寄 email畀你，假 link收喺圖入面，唔 show出嚟， click圖就直接帶你入釣魚網站。好彩家好多人都識提防呢類 email。最多係用手機上網時，貪方便唔想打多次網址嘅人先會中招。
易上釣度： 60%
好似呢封 email，都冇 show網址出嚟，只係 click圖入網頁，睇寄件者電郵 address又好難知真假，都係唔 click為妙。
拆解辦法： bookmark才是王道
呢 3種釣魚招其實唔太嚴謹，黑客只係博間唔中有失魂魚，冇睇清楚條 link就 click入假網站 login。最簡單又最有效嘅拆解方法，就係任何時候都自己開新 browser打網址，唔記得或想懶嘅話，就用 bookmark啦！
瞞天過海型
;)
就算你完全唔掂老翻，只要用 WiFi時唔小心，上錯賊船 hotspot，一樣有機會中招。因為黑客可以喺自己個 hotspot度放入 spyware，你經免費嘅 hotspot上網，中間俾人做晒手腳都唔知，隨時任人帶去釣魚網站。
易上釣度： 95%
喺街搵到有 hotspot冇 set密碼，就以為好筍黐嚟用，真係中咗黑客招都唔知乜事呀！
;)
唔買正版軟件嘅人，成日會上黑客網站搵 crack程式，去將試用軟件變完全版，但啲 crack程式可能含有 spyware，會入侵你個 browser，當你打網址上國際大站時，明明冇打錯字，都會帶你去到釣魚網站，勁邪惡！
易上釣度： 90%
唔係講笑， Google同台灣 Yahoo拍賣場都試過俾人成個複製，再由 spyware帶人上釣，勁危險！
;)
Search bar假搜尋
網上流傳嘅小型軟件，好似睇 RMVB、轉 MP3等（多數同老翻有關），可能俾黑客做過手腳，安裝時會自己裝個 search bar喺 browser上面。睇落好似係 Google搜尋欄，但其實係假扮，搵出嚟嘅網址亦可能係假釣魚網站。
易上釣度： 85%
Search bar就裝喺網址欄下面，打關鍵字就即刻 search到嘢，貪方便嘅人就會中招，記住打網址入 Google先好 search！
拆解辦法：隔絕邪道老翻
呢 3種高階釣魚招，真係令人防不勝防，就算次次都係自己打網址，亦有機會中招。惟有平日用腦上網規矩啲，唔好掂任何老翻軟件；用人哋個 hotspot上網時，就避免上銀行等要 login嘅網站。另外， BT等邪道 forum同鹹網盡量少去，因為有啲 spyware，係可以喺睇網頁時自己安裝，而你係唔知嘅！雖然呢樣可以透過 IE嘅設定去防止，但唔係完全穩陣 o架！
;)
間唔中喺 IE>工具>網際網路選項入面刪除 Cookie，即係洗晒網站留低喺你部腦嘅痕跡，亦可以減低中 spyware嘅風險。
;)
喺 IE>工具>網際網路選項>安全性入面揀自訂層級，然後將全部 ActiveX選項都校做停用，就冇咁易俾人偷偷裝 spyware。
