TH 勝手

地址：大坑銅鑼灣道 134號
電話： 2806 3678
營業時間： 12:15pm-3pm， 6:15pm-12mn
平均消費：$300

天氣終於涼涼哋，想打邊爐？仲去酒樓或者連鎖店？日式鍋物已經全面入侵，今年港式火鍋大受威脅！
未到秋天，新火鍋店陸續開業，這間將日式 shabu shabu左添右加，似足打邊爐；那間主攻北海道牛奶湯底；一人一鍋又比以往多。總之，唔再係鴛鴦鍋配手切肥牛游水海鮮咁簡單，集合中式日式優點，先至係今年大熱 hotpot。

勝手靠每日鮮熬的香濃鱲魚湯打出名堂，開業幾個月就在銅鑼灣道開分店，同樣將座位設計成 U字形吧位，俾客人排排坐一人歎一鍋 shabu shabu。新店較寬敞，座位多一倍，暫時仍未日日爆場，忽然想食 walk in也可以。

夠膽喺短期內開新鋪，當然不是純粹將原有一套搬過來。這裡參考銀座餐廳 Shabu禪，增設活動式切肉機，客人點菜後，師傅會將切肉機推到客人面前，即切肉即奉客，絕對不會貪方便預早切好，破壞肉質。

對奉客程序更講究，因為新店賣更多高級和牛。宮崎西冷、鹿兒島喜刺、佐賀肉眼等六款，四款達 A4及 A5級，放入魚湯中只要灼幾秒，入口柔軟溶化，肉味香濃。嫌一種吃法單調，串燒小吃也加了十多款和牛菜式，鵝肝漢堡用上頂級和牛的肉碎來做，應該可以滿足你。

宮崎和牛肩底（ A4）
鹿兒島和牛喜刺（ A4）
宮崎 A5西冷
散叫 A4和牛$330/150g，宮崎 A5西冷$380/150g。

切肉機放喺吧枱中間，新鮮整潔，一目了然。

和牛以外，還有不少海鮮可單點，鱈場蟹腳$180。

一口和牛鵝肝漢堡（前）$90入口油潤啖啖肉汁。和牛野菜卷（中）$68、和牛粒飯團（後）$48。

新店限定的全新佐賀牛紙鍋$260，豆乳湯很清香， A5級佐賀肉眼是多款和牛中肉質最滑，雖然只得 80g，不過連雜菜、烏冬及甜品，絕對滿足。