TH 嵐山料理

試過中央圖書館旁嵐山料理的吉列炸物，發現街邊小食都可以好有誠意兼水準高企。唔似一般街邊檔請小妹妹或大嬸看鋪，兩位做廚出身的老闆，買料、預備食材汁醬、炸物所有步驟親力親為，加上喺吉列名店 Tonkichi做過，堅持即叫即炸，生蠔、芝士蝦串等等全部熱辣香脆。
用料亦似餐廳揼本，揀日本廣島蠔，細細隻味鮮濃，每日只預備三四十份，賣完就算。芝士用瑞士車打和法國金文畢，一種煙韌，一種炸得半溶，超正！油溫、炸漿以及麵包糠等細節也講究，麵包糠有兩種，每日將新鮮麵包磨碎，用在魚或蠔等腍身食材，外層鬆脆內裡 juicy；另一款乾麵包糠較硬身，炸好後口感更脆。老闆更不時創新款式保持新鮮感，抵去幫襯多幾次。

嵐山料理

地址：摩頓臺灣景樓 6B號鋪
電話： 9225 6209
營業時間： 10am-10pm
平均消費：$30

鵝肝芝心薯茸丸$25/3粒，質感香軟，醬汁用煎鵝肝做，心思抵讚。

和風辛味軟殼蟹$28
搽滿了蝦膏炸，辣辣哋幾惹味。