竹和木傢俬，論普遍程度，必是後者。在香港以經濟科技行先的社會，木匠可謂式微。想後生一輩投身這行業更是妄想。眼前紮髻貌似藝術家的這個男子，從前是髮型師，同時也是個木癡，一得閒就在家中 D.I.Y.自製家具。後來索性轉行，搖身成為木匠。總之每次有人和他談到木家具，就雙眼發亮。
;)
Dino的 Studio同樣用木家具為主，舒服又天然，腦便秘時就坐低睇書搵靈感。
我叫 Dino，自細對木情有獨鍾，因為木好有生命力，所以我不時拿住嚿木左雕右鑿。後來投身社會工作，喺 salon做 hair stylist，幫人剪髮，之後仲開埋舖㖭，叫做有啲成績。但依然愛木愛到發燒，嗰時住新界村屋，有地方俾我自設小工場，一放工就立刻返屋企玩木玩通宵，又會四圍執舊卡板、樹枝改頭換面，又鍾意幫親戚朋友整傢俬，諗番起都覺得自己瘋狂。
後來把心一橫，放棄髮型事業，全身投入當木匠，從頭做起。以前 D.I.Y.係興趣，但變成事業就唔可以玩玩吓，真係慢慢摸清邊種木料啱做邊款家具，同時又要適合香港潮濕天氣，一啲都唔簡單。咁多年來最滿意作品係幾年前用卡板製成書架，只係用 10分鐘時間搞掂，之後再隨意上色，冇乜特別修飾，但啲朋友一見大讚好型，十足 art piece，令我有好大滿足感。
塑膠或者金屬家品都唔環保，我好想多啲香港人用木傢俬，所以近來少咗自己 D.I.Y.，專去諗設計，因為我想將實木傢俬推廣開去。現時木製傢俬以 modern furniture為主流，我會喺 9月推出一系列簡約設計傢俬。選材上，經過多番實驗，最後俾我搵到市面上較少人用非洲黃花梨木，顏色夠自然，用 original色調加埋天然紋理已經好靚。其次密度亦夠高夠平均，冇咁易變形，幾潮濕都唔使驚。另外仲有一個特點，呢種木有陣天然氣味，會辟走蟲蟻，絕對啱晒香港嘅居住環境。
;)
由原條樹枝組合而成燈座，係 Dino早期作品，風格較 raw。$1,100
;)
由東南亞入口木茶几，係 Dino店中最愛，用飽歷風霜嘅老柚木樹幹做支架，唔會變形又夠 tough。$3,800
;)
無背坐椅，亦可當作茶几用，多用途適合香港家庭。售價待定。
;)
全木坐椅，全用入榫製作而成，簡約設計充滿歐洲 designer chair影子。售價待定。
型木宅
Dino也有「搬屋癮」。由 98年至今，搬屋 5次以上，每次亦有不同的「木主題」布置。
;)
1998年：用木頭加磚頭幫自住公屋變身。
;)
1999年：專登用木板加磚頭做圍欄，與狗狗共處一室。
;)
2002年：用木枝紮成燈罩。
;)
2006年：飯廳採用較 classic的木傢俬布置。
;)
2011年：以不同色彩鋪滿牆身，型！
木料知多啲
;)
黃花梨木
特性：顏色金黃，紋理則清晰如流水。木性穩定，即使係寒暑季節亦不易彎曲變形，還會滲透出自然清香的氣味。
主要產地：中國海南省、越南、非洲等。
適合家具：坐椅、飯枱等。
;)
胡桃木
特性：顏色深褐色，紋理通直，堅硬度高可抵禦撞擊，收縮率較小。加工性能良好，鑽孔、榫位等都有良好效果。
主要產地：美國明尼蘇達州、新澤西州、紐約州、喬治亞州等。
適合家具：廚櫃、化妝枱等。
;)
櫻桃木
特性：呈艷紅色至棕色，經日曬後顏色會變深，紋理細緻均勻和平滑，經磨砂及拋光後效果平滑，缺點乾燥時收縮率大。
主要產地：美國賓夕凡尼亞州、維珍利亞州、紐約州等。
適合家具：地板、門、廚櫃等。
;)
柚木
特性：色澤暗褐，含有油分，木紋通直。機械性質極強，收縮率較小，耐用強韌，加工容易、是製作家具最常用的木材。
主要產地：緬甸、印尼、泰國、台灣等。
適合家具：睡牀、書櫃等。
;)
橡木
特性：呈黃褐和紅褐色調，質地細密兼木紋鮮明，不易吸水之餘穩定性亦高。
主要產地：美國、俄羅斯、土耳其等。
適合家具：門、書櫃、睡牀等。
;)
樟木
特性：顏色由紅棕色至暗棕色，密度極高不易變形，還有強烈樟腦香氣，可預防蟲蛀和發霉。
主要產地：中國江西、湖南。
適合家具：地板、餐枱、儲物箱等。
