Steak

多得一眾新扒房相繼開業，人人瘋狂吹捧，牛扒熱席捲全城。當中各有賣點，牛扒品種也越來越刁鑽，來源地由大路的美加澳去到西班牙阿根廷，就算唔係食肉獸，都按捺不住趕上熱潮拿起刀叉。幫襯前，等我同你先惡補一下牛扒冷知識吧。

Medium rare最佳

牛扒的生熟度根據肉中心溫度分為 Rare（ 52℃）、 Medium rare（ 55℃）、 Medium（ 60℃）、 Medium well（ 65℃）及 Well done（ 71℃），叫 Medium rare最可吃得出牛肉的鮮味，中心呈鮮紅色而且溫暖，仍有血水滲出。

牛部位解構

牛扒可簡略分成三個部分，牛柳（ Tenderloin或 Fillet），肉質腍，但脂肪比例較少；西冷（ Sirloin）肉味重，但肉質較結實；肉眼（ Rib Eye）脂肪最多，吃起來 juicy帶油香，所以最受港人歡迎。不同部位又可分成不同切法（ cut），如現時大熱的 Porterhouse是同時帶有牛柳及西冷位， New York Strip是近尾的腰脊肉（ short loin），油花比一般西冷細密。

12安士夠晒數

牛扒通常逐安士計， 1安士等於 28克，一人分量約 12安士，但而家流行大件頭，閒閒哋幾十安士牛扒都有得食！

利刀鋸扒

鋸靚扒要清脆利落，保持肉塊完整，所以絕對需要一把鋒利的刀。部分扒房有多款刀可以讓食客選擇，大多只是花紋款式唔同，有沒有鋸齒都冇所謂，最緊要啱手形同夠鋒利即可。

雖然沒有明文規定，但牛扒大多是由左邊開始吃起，較為順手。最好逆肉紋來切，將肌肉之間的紋理切斷，這樣食起來會較容易咬開，唔會似牛肉乾般嚼極唔斷。

最好不加鹽加醬

煙燻海鹽
喜馬拉雅山岩鹽
純海鹽
西芹籽海鹽

食扒標榜鮮味，但唔少人都鍾意落鹽及胡椒自行調味，加鹽，以岩鹽及煙熏鹽較適合吊味，其他特別口味如香草鹽， gimmick居多，搶去牛扒本身的鮮味，不下為妙。在高級扒房，唔會見到黑椒及蒜茸汁這些濃烈醬汁，這些只會出現在茶餐廳，多為掩飾質素平平的牛扒。靚的醬汁不會杰撻撻，味道清新不過濃。

明火烤扒最香口

點解扒房比在家煎牛扒美味香口？主要因為爐的問題，扒房的烤爐唔係炭爐，就是火力夠猛的烤爐，溫度夠高，可以將牛扒快速烤熟並保存肉汁，吃起來就特別惹味 juicy。