Salsiccia$148，侍應推介的 pizza，明明是 broccoli rabe，但似炒燶的菜心； Scamorza的芝士味亦無乜。
尖沙咀海運大廈地下，對海一列餐廳，面向郵輪碼頭，景觀無敵。 Caffe Habitu搬走後，靚鋪懸空，一直好奇由哪一間餐店頂上，求神拜佛是新名字，不要再由連鎖店壟斷，浪費大好位置。結果，開估是大名鼎鼎的米芝蓮星級名廚 Michael White。難免期待。
Michael White在紐約共打理三間意大利菜餐廳，加埋，拎過六粒米芝蓮星星。 AL MOLO是 Michael White首次進軍海外的試金石，派出徒弟 Jimmy Everett擔任行政總廚。餐廳名字 AL MOLO是意大利文，解碼頭。改得個咁有詩意的名字，加埋 Michael White個名，仲唔係行 fine dining路線？
訂了枱，揀平日夜晚幫襯。第一眼嚇到我的，不是有人排隊不是環境豪華，是放於門口一張宣傳海報，自助午餐$148。$148？如果是 fine dining，平爆。我從來唔相信貴嘢先好食，又貴又難吃是很常見的自然現象，一點沒有驚訝，但有了消費指數比預期低的心理準備打底，我的包容力已經相應作出調整。
行入餐廳，還是有點點驚訝。環境格局是典型西餐廳情調，但座位擺放未免太密，在兩邊座位中間擺多一行四人位，如果坐滿客，正常人應該無法步行穿過，逼到呢，似去屋邨茶樓搵位，但係人哋茶樓光光猛猛，呢度就黑黑沉沉……
;)
又係 open kitchen裝修，班廚非常輕鬆，你見到一嚿嚿冰鮮雞冰鮮豬被搬出雪櫃，胃口即大減。
;)
意粉製造位置面向商場方向，任人參觀，背後便是通往廁所的走廊，更惹味。
平吖嘛，當然要坐逼啲做多啲客， OK，我明白。打開餐牌，果然夠平， pizza平均都係$120左右， Pizza Hut或芝脆雞價位，你去連鎖意大利菜餐廳 order都差不多。叫侍應來推介，沒有笑容，不主動解釋，企得很直，說話很細聲，以為我們一定聽得很清楚，跟你去快餐店見到那些年輕兼職學生的服務態度，差不多。上菜速度超快，好似點完菜唔使五分鐘已經煮好食得，比你去大××吃個叉雞飯還省時間。根據侍應推介點了幾道菜，最令人難忘是那個號稱必須一試的 Salsiccia pizza，上枱時，食物溫度應該接近室溫，不夠熱，逼不出芝士味， pizza上的菜一條條無水分似菜乾，屍體般形狀攤放在餅底上，很失望很失望很失望。我以為只有呢碟失準，跟手上場的意大利雲吞也遇到相似情況，又係唔夠熱；另一碟羊肉亦明顯吃得出食材不夠新鮮。食完，未食飽，但想再 order的意欲已經沒有。
埋單，三個人食餐不太飽肚的晚餐，冇開酒，$949。講真，唔貴，以同區同級米芝蓮餐店之米芝蓮名氣，算好平，睇睇張單，原來收多一蚊，捐去 Room To Read的慈善計劃，你捐一蚊，佢公司又捐一蚊。但係現場無人解釋無人通知老奉一樣，我不可以不喜歡做善事嗎？幫襯之前，你又唔同我講定先？我向來覺得飲食是主觀的一件事，我覺得好，你未必；我批評，你也可以持相反意見。但吃完這一餐，在座三個人，大家都話情願出去加個漢堡包或雲吞麵。無辦法啦，新開張，侍應已經夠數，但唔醒目，無人主動執碟，搞到上菜時客人要幫埋忙執乾淨個位俾侍應放菜，仲唔係快餐店或茶餐廳？
;)
Carpaccio$138，薄薄一片生牛肉，算鮮甜，頭盤是整餐飯最出色。可能，因為，不用熱食。
;)
Agnello$298，將羊扒切成一塊塊上枱，可惜羊肉不新鮮，又係衰唔夠熱，令羶味更明顯。
;)
Pansotti$148，本人熱愛 Ravioli，但呢碟，號稱是 slow cooked tomato，我完全食唔出番茄味。
;)
試食時，人客不多，還可以，但想像不到坐滿客時，會逼成點。
;)
始終是無敵維港景殺食，你訂位，記得訂露天位，闊落得多，有酒吧枱，係多啲人食煙之嘛。
評分
;)
服務：★★
環境：★★★
價錢：★★★★★
AL MOLO
;)
電話： 2730 7900
