魷

「咦！咪住！你明明係墨魚！我喺街市見過你。」 A說。
「唔係，你係花枝，酒家擺酒那道西芹炒花枝就係你。」 B說。
「唔係，我睇 NGC紀錄片，話你係八爪魚就真。」 C說。
「都唔係，你其實真名叫鱆魚，曬乾可以煲湯嘅！」 D說。
錯錯錯！其實墨魚又叫花枝和烏賊，八爪魚即是鱆魚，
他們和魷魚一樣都係軟體動物頭足類動物，屬同一科但不同種，是魷魚的遠房親戚。
大家搞錯，是因為魚有相似，都是軟趴趴，又有觸鬚，又會噴墨汁。
魷魚、墨魚、八爪魚雖然同在香港水域生活，但其實有好多不同之處，等我帶大家認識一下如何分辨。

香港土生大尾魷

體圓頭似錐、觸鬚共十條、聞名豉椒炒、炭煨最適宜

教你一個分辨魷魚的最簡易方法，就是看觸鬚。
魷魚有十條觸鬚，兩長八短。而墨魚雖也有十條觸鬚，但齊輯輯沒有長鬚，而八爪魚則只有八條觸鬚，數一數就不會錯。香港最常見的大尾魷，又叫「荷包魷」，街市魚檔常見，十條觸鬚生長在頭部，頭下是個長長的魷魚筒，十足「荷包」一樣，筒邊還長了兩塊鰭，幫助划水推進。
每年 12月至 5月，是大尾魷當造期，牠們只生活在近岸水域，平時會連群結隊游弋在一百米以下的深海，有時又會游上多礁石的淺海中，漁民要用餌引牠們游上海面，再用網捉，有一定難度。但大尾魷肉厚爽脆，曬成土魷會變韌，鮮吃最佳，一般用來白灼，味道最好。近年香港海域污染，令大尾魷的數量不斷下降。產量減少，漁民就捕捉牠的同胞兄弟——火箭魷來補數。

同胞兄弟火箭魷

火箭魷又稱句公、柔魚或槍烏賊。因為身體呈長錐形，形如火箭，所以叫火箭魷。牠較大尾魷纖瘦，筒邊也有兩片鰭，十條觸鬚也是其中兩條較長。身軀約一呎長的，俗稱「長筒」，更長的叫「長龍」。
每年 4月至 8月，是牠們的當造期，由於香港水域污染，漁民多駛往南中國海一帶捕捉。捉火箭魷比捉大尾魷易得多，火箭魷喜光，漁民捕捉時，用大光燈引誘其浮上面，再用網撈從其後堵住逃走方向就成。因為產量多，所以在街市見到的，八九都是火箭魷。
火箭魷肉較大尾魷薄，腍滑易咬，味鮮甜，無論新鮮吃或曬成土魷皆美味。

疏堂表弟墨魚

甚麼是墨魚？潮州冷檔上見到那又肥又厚的橙色怪物，就是墨魚。
牠有幾個名，烏賊、墨鬥魚及花枝都是常見的名字。又由於魚筒未端有支針，用作防衛，又稱「針墨」。
墨魚魷魚最大不同，除了觸鬚數目外，還有牠的觸鬚沒分長短。另外，身體橢圓像個頭盔，頭盔內有一條船形石灰質硬骨，獨一無二，和魷魚只得一條薄薄半透明軟骨大不同。
而且身體明顯較魷魚肥厚，韌性強，需要薄切或攪碎做丸才可吃。墨魚的墨汁又較魷魚多，且含毒素，可以麻痺退敵。
每年 9月至 3月，是墨魚當造期，全港街市都見墨魚蹤影。

遠房親戚八爪魚

細心看看，八爪魚的外形，和墨魚及魷魚其實明顯不同。頭圓圓大大，無骨，有八隻又長又粗的觸鬚，觸鬚佈滿圓大的吸盤，徒手捉牠，牠會大力吸啜着你。
牠們擁有無脊椎動物中最發達的大腦，曾有科學家將食物放在一個有蓋的玻璃瓶子內，八爪魚可以立刻打開瓶蓋享用內裏食物，聰明可見一斑。
牠常躲在海床礁石洞罅內，要潛水徒手捕捉，產量很少， 1月至 8月為當造期，街市偶見有活的出售。
活的八爪魚，肉質很韌，要切得細碎才易入口，灼熟切粒蘸豉油熟油，可吃出八爪魚的鮮味。