電話： 2904 4333
自從發展出一個小西灣，多了人口，連帶柴灣都興旺起來，起碼現時與明報舊同事茶聚，又或者跟在 Now上班的朋友午飯，原區安置，走上 Ricky Cheung的小小法國餐廳，都不知幾愜意，最近俾我發掘到「拿督」冰室，已經樂得一陣陣，沒想到，新嘢陸續有來。
這一次連地址對我而言都係新嘅，你知道青年廣場嗎？若果我知道正確地址，也許我會選擇坐地鐵而放棄的士，因為出地鐵過一條行人天橋即可到達，加上的士司機放下我之後，我竟然有點迷失柴灣之感，也許是因為青年廣場乃全新的一座建築物，而且與商業用途毫無關係吧！不若 K11又或 iSQUARE，即使行開未去過，都會略有所聞，在青年廣場繞場一周才勉強找到「我估，應該係，好似，大概」的入口，盲摸摸咁，摸上四樓，都仲以為錯，因為周圍全是工程中未拆卸的圍板，你說這樣的經歷是刺激還是令人沮喪呢？我的感受屬於後者。
青年廣場其實是政府興建予青年使用的一個多用途場地，有劇場，有廣場（表演、集會用）、有旅舍，有訓練場地，自然也有食肆，在缺乏任何宣傳下，這間太極樓多少帶有一點神秘色彩。
也許建築設計上不是打算租予一間京滬菜館，若然是西餐，相信效果會更佳，因為地方大，樓底又夠高，四周有大量窗戶透光及有街景，似乎所有環境配套都不是預期這兒開中菜。晚飯時間所見，有三分一客人入了座，舉目盡見一家大細，扶老攜幼，拖男帶女的局面，我們一行三人，份屬舊同事聚餐，點菜各抒己見，包括：$28上海酵麩、$30雞絲粉皮、$58例牌酸辣湯、$48糖醋排骨、$40乾煸四季豆、$80樟茶鴨、$108原隻紅燒元蹄以及$18（ 4隻）小籠包。
;)
上海酵麩$28
;)
雞絲粉皮$30
;)
小籠包$18/4隻
;)
乾煸四季豆$40
睇見菜式的價位係咪有啲替我擔心，唔知我會有乜嘢入口呢？係你就錯喇！八道菜中，唯一沒有碰的只有糖醋排骨，你有眼睇，成碟生炒骨咁，點配叫做糖醋排骨，話晒顏色都要深番啲吖，又唔係用浙醋做，用鎮江醋，有乜理由變成咁樣？仲有那些青椒、菠蘿，冇眼睇之餘都費事食，也稍嫌酸辣湯略「杰」。
兩味頭盤，酵麩和雞絲粉皮都食得過，尤其是當我留意到價錢才三十塊錢，分量又 OK，你仲想點吖？至四季豆，四十元一碟計，水準是超值了，有時在一些滬菜館吃到貴一倍的，水準亦未必及得上這一碟，不過先旨聲明，正宗的乾煸四季豆，四季豆最後又黑又軟，但香港人慣食翠綠的蔬果瓜菜，所以一般都做得比較生、顏色才得以保存那點點綠吖嘛！亦因此，這兒的豆是偏向翠綠以及脆口的。
樟茶鴨和紅燒元蹄中，鴨較得我心，因為元蹄一上枱，服務員二話不說幫忙剪開一段段，我們三人忙於說是非八卦，來不及趁熱吃，我吃的時候只有七分熱，加上我愛連皮吃，味道口感還算不錯，可是我想吃第二口時，菜已經涼了，樣子都不能吃，惟有打包回家再煮熱，否則浪費！那隻樟茶鴨真是做得出色，是四季豆以外，我吃得最多的一碟，大概食了四、五件，賣個八十塊錢，更叫我珍惜。
這一頓飯三個人叫八個菜，埋單連茶芥加都只是$461，人均消費$153.7，如果不是想試多個口味，相信人均消費可以低至$80，最後我忍唔住一定要告訴大家，茶芥每位只不過係$3，也許是我光顧那麼多餐廳，要收茶芥錢中，最平宜的一次，當然茶的質素不可以跟陸羽的廿幾蚊一客茶可以相提並論，但街坊生活街坊價錢，真是街坊之選！
