forever hea: SW ABC Kitchen

地址：上環德輔道西 38號一樓皇后街熟食市場 CF7
電話： 9278 8227
營業時間：星期一至六 12nn-2:30pm， 6:30pm-10:30pm，星期日 6:30pm-10:30pm
平均消費：$150

熟食中心有西餐 fine dining。
熟食中心有健康的無味精小菜。熟食中心連日本和食都有！

尋常的晚上，一個尋常的熟食市場，出現一個不尋常的畫面。
這邊阿叔打大赤肋打冷隊啤氣氛熱鬧，那邊殺出狂潮一樣的紅白枱布西餐陣式，後生仔半坐高腳椅上手搖半杯 sparkling wine，年輕情侶含情對望鋸羊架。
更奇情的是這家叫 ABC Kitchen的食肆竟然晚晚爆場，不訂位鐵定要吃閉門羹。這事，和《千奇百趣香港地》裏面介紹的一樣新奇。
因為新奇，所以吸引了大批年輕人來幫襯。
老闆 Joe解釋：「餐廳點解叫 ABC？因為易記囉，又有 a better cooking的意思，唔通好似隔籬間尼泊爾鋪頭叫 Chautari咩，無人記得 o架！」「點解開餐廳？因為中年危機囉，升職到咁上下就無得升，加上原本做的 M at the fringe結業，我就搵埋舊鋪個 junior chef，闖一闖。中年創業驚唔驚？個心態就好似追女仔咁，你肯追，有一半機會成功；唔追，就一定無機會！所以，為咗過老闆癮就開了 ABC。至於開在熟食市場，當然是因為鋪租平、蝕唔死啦，哈哈哈。」
別看 Joe一臉談笑風生，中年男對這付諸一搏的小餐廳有很多大大小小的堅持：熟食市場預設的圓枱屬四人座，他寧願讓一對情侶/二人朋友有點私隱也堅持不設搭枱；餐上有原粒胡椒和海鹽作調味，咖啡只用 illy的；他希望客人習慣食西餐配餐酒，方法不是硬銷，餐酒隨餐附送；上菜時也會按食客進度逐道而上──總之，一切就像以前他在 M at the fringe的做法一樣。

曾記粿品、潮州打冷搭西餐鋸扒，感覺很怪異吧？

在街市喝到 illy咖啡，新奇！

用料媲美高級西餐廳

煮法也絕對認真。像招牌的西班牙燒豬，細心按摩過後稍醃，用焗爐以猛火燒至脆身，再轉慢火細烤，汁醬則用雜菜加豬手豬腳煮成，每個步驟都不偷懶；馬賽魚湯則以每天新鮮買的小魚煮成，還加了正宗做法一定用的原絲番紅花花蕊，香味顏色也是頂級的。其他如意粉、意大利米等用意大利貨，香草汁、餐麵、甜品則是自家製的。
「本來想自己做埋薄餅皮、意粉，廚師鬧我話，廚房得佢一個人，點做呀？無所謂，咪唔賣薄餅囉。」
寧缺勿濫，所以這兒的食物選擇少得出奇。不論午市晚市，散叫的只有兩款意粉、一款意大利飯，主菜僅四五款，白酒煮蜆、三文魚兩吃這些是日特選只偶然供應。另外還有兩款一人套餐和一款二人套餐。最人氣的是二人套餐，有齊招牌燒豬、意粉、餐湯、沙律連餐酒，才$368，分量大得足夠三個女生吃，質素亦高，意粉、意大利飯做得煙韌，招牌燒豬皮脆肉嫩，羊架火候拿揑準繩，除了稍嫌汁醬、配菜簡單外，將貨論價， ABC好吃過不少中價意菜館。